Dipolog City- Nahimong mabungahon ang implementasyon sa usa ka programa sa Department of Social Welfare and Development (DSWD) nga nagtumong sa paghatag og temporaryong trabaho ug pinansyal nga tabang alang sa kabatan-onan, diin 300 ka estudyante ug graduates sa Jose Rizal Memorial State University (JRMSU) ang nahatagan og oportunidad pinaagi sa Cash-for-Work Program, atol sa culminating ceremony nga gipahigayon sa JRMSU Gymnasium kagahapon, Agosto 29, 2025.
Pinaagi sa KALAHI-CIDSS Kapangyarihan at Kaunlaran sa Barangay (KKB) Cash-for-Work Program, ang DSWD Field Office IX nakapahimutang og mga benepisyaryo nga gikan sa mga kabus ug climate-vulnerable nga komunidad. Ang mga partisipante nakadawat og bayad isip balos sa ilang aktibong partisipasyon sa hinungdanong community service.
Gisaysay sa report nga matag benepisyaryo mosalmot og dili moubos sa 50 ka adlaw nga serbisyo, ug makadawat og sweldo nga makatabang sa ilang pamilya samtang nagdugang usab og kasinatian sa trabaho. Ang deployment gipahigayon sa nagkalain-laing partner institutions lakip na ang mga campus sa JRMSU sa rehiyon, Department of Education Division Office sa Dapitan City, daghang Local Government Units, ug ang Philippine Ports Authority.
Gipadayag usab sa DSWD nga unom (6) ka graduates gikan sa inisyal nga batch ang nakaseguro na og permanenteng trabaho sa mga institusyon diin sila gitugyan, nga nagpakita nga ang programa epektibong lakang padulong sa regular nga employment.
Sa datos sa ahensya, ₱3.52 milyon na ang napanagtag gikan sa kinatibuk-ang ₱5.18 milyon nga grant alang sa programa sa bulan sa Agosto. Dugang ₱1.46 milyon ang ipagawas aron tabunan ang payroll sa 192 pa ka benepisyaryo, diin matag-usa makadawat og ₱7,452.00 isip bayad sa ilang serbisyo.
Mitambong sa maong kalihokan ang mga opisyal sa JRMSU nga sila si Dr. Maria Rio Abdon-Naguit, Presidente, ug Dr. Jay D. Telen, Vice President for Academic Affairs, uban sa mga representante sa DSWD nga sila si Ms. Lea L. Nieva ug Maibel O. Bermejo. Ang ilang presensya nagpasiugda sa lig-on nga panaghiusa tali sa state universities ug mga ahensya sa gobyerno alang sa regional development ug sa pagpalambo sa kabatan-onan.(Jumalisa Papa)
Source: DSWD FIELD OFFICE IX-ZAMPEN