Pormal nang gibuksan Pebrero 16, 2023 ang 7th Provincial Liga Convention cum Disaster Risk Reduction Management Seminar Workshop, nga gipahigayon sa Zamboanga del Norte Convention and Sports Center nga nahimutang sa Barangay Estaka, ning Dakbayan sa Dipolog.
Ang 7th Liga Convention nagdala sa temang,” LNB Zamboanga del Norte Chapter-Working hand-in-hand for a deeper understanding on Current Issues, aiming to serve people better.”
Matod pa ni Liga Federation President, Board Member Rogelio M. Isip, lakip sa mga mitambong sa seminar-workshop mao ang mga Liga Presidents sa 25 ka lungsod ug 2 ka dakbayan sa Dipolog ug Dapitan.
Nahimong pinasidunggang dinapit sa pagbukas sa 3 ka adlawng kalihokan mao si Department of the Interior and Local Government-9 Regional Director Paisal O. Abutazil, CESO III.
Sa iyang mensahe, iyang gihatagan ug punto ang dakong papel sa mga kapitan sa matag barangay, ingon man ang kahugpungan sa mga kapitan sa kinatibuk-ang kalambuan sa nasod.
Samtang sa iyang bahin, gipasalamatan ug dako ni Governor Rosalina “Nanay Nene” Jalosjos ang mga kapitan sa ilang suporta nga maoy nagbutang kaniya sa iyang nahimutangan sa pagkakaron.
Gihatagan ug punto ni Gov. Jalosjos ang kamahinungdanon sa panaghiusa ug pagtinabangay nga maoy magdala ug dugang kalambuan sa Zamboanga del Norte, subay sa panultihon, “In unity, there is strength,” panapos pa ni Gov. Jalosjos.
Lakip usab sa mitambong sa pagbukas sa 7th Provincial Liga ang mga membro sa Sangguniang Panlalawigan nga sila si Board member Patri “Jing” Chan ug Angelica Carreon sa unang distrito sa Zamboanga del Norte, Board Member Peter Co ug Michael “Jojo” Documento sa ikaduhang distrito ug Board Member Kay Marie Bolando sa ikatulong distrito ug Second District Representative, Congresswoman Glona Labad-labad.
(Source: Provincial Information Center Zanorte Facebook page)