Gilunsad kaniadtong Mayo 4, 2026 ang 32 ka adlaw nga pagbansay sa Organic Agricultural Production (NC II) alang sa mga miyembro sa COCOB ALSA MASA Farmers Association sa Barangay Cocob, Gutalac, Zamboanga del Norte.
Gipangunahan ang kakihokan sa R-PSB Team sa Zamboanga del Norte 2nd Provincial Mobile Force Company (ZNPMFC) ubos sa liderato ni PLT Paolo Miguel S. Mercado, Operation PCO, ug sa pagdumala ni PLTCOL Edwin D. Verzon, Force Commander, ug nahimo kini pinaagi sa pakigtambayayong sa May Cheng Chang Technical School, Inc.
Ang maong programa gipondohan pinaagi sa scholarship sa Philippine Coconut Authority (PCA), nga nagtumong sa paghatag og kahibalo ug kahanas sa sustainable o organikong pagpanguma.
Labaw pa sa pagbansay, gilauman nga kini magbukas og dugang oportunidad sa panginabuhian alang sa mga mag-uuma ug makatabang sa pagpauswag sa ilang kahimtang sa kinabuhi. Usa usab kini ka lakang sa pagpalig-on sa kalinaw ug kalamboan sa komunidad nga kaniadto naapektuhan sa kagubot.(IKEN B. GULLEM)
Source: Zamboanga del Norte 2nd PMFC