Nakumpiskahan sa kapulisan ug mokabat sa kapin P54,000 nga kantidad sa ilegal nga drugas ang usa ka 19 anyos nga estudyante atol sa gipatoman nga buy bust operation didto sa Sitio Dipag, Barangay Anongan, Sibuco, Zamboanga Del Norte, niadtong Mayo 4, 2026.
Ang dinakpan naila nga usa ka 19 anyos nga lalaki, ulitawo,estudyante ug residente sa nahisgutang lugar.
Gidakop pinaagi sa mga operatiba gikan sa Sibuco Municipal Police Station, uban sa koordinasyon sa 2nd Zamboanga del Norte Provincial Mobile Force Company.
Atol sa operasyon nakumpiska gikan sa dinakpan mao ang mga heat sealed transparent plastic sachet nga adunay sulod sa gituohang shabu nga mutimbang sa gibana-bana nga walo ka gramo, nga adunay gibanabanang kantidad sa kadalanan nga Php 54,400.00.
Ang dinakpan anaa karon sa kustodiya sa Sibuco Municipal Police Station alang sa hustong disposisyon, samtang ang mga nakumpiska nga ebidensya isumite sa Regional Forensic Unit 9 sa Zamboanga City alang sa laboratory examination.(MEDALYN U. BORJA)
Source: ZNPPO