Sikop sa mga kapolisan ang 27-anyos nga lalaki nga residente sa Purok 1, Barangay Minlasag, Sibutad, Zamboanga del Norte atol sa gikasa nga law enforcement operation sa Barangay Sinaman, ning dakbayan sa Dipolog sa nakalabay nga adlaw.
Ang pagdakop gihimo pinasikad sa warrant of arrest alang sa duha ka kaso sa rape nga may kalabotan sa Republic Act 7610 o ang Special Protection of Children Against Abuse, Exploitation and Discrimination Act, nga gi-isyu sa Regional Trial Court, Branch 12, Naujan, Oriental Mindoro. Ang maong kaso walay girekomendar nga pyansa ang korte batok sa suspetsadong dinakpan.
Ang maong operasyon gipanguluhan sa mga kapolisan sa Dipolog City Police Station, inubanan sa RMFB9, ZN PIU, ug Naujan MPS, resulta sa malampusong pagkasikop sa suspetsado.
Sa pagkakaron ang dinakpan kinsa anaa na sa kustudiya sa Dipolog City Police Station alang sa tukmang disposisyon.(Angelica T. Obina)