Nagpagula og pahimangno ang Bureau of Fisheries and Aquatic Resources (BFAR) Region 7 kagahapong aslawa, Hunyo 13, 2025, kabahin sa hulga sa red tide human makit-ang positibo ang mga water samples gikan sa Siit Bay sa Siaton, Negros Oriental sa Pyrodinium bahamense, ang klase sa toxic plankton nga hinungdan sa red tide.
Gikuhaan og tubig ang maong lugar niadtong Hunyo 10, 2025 ug gi-screen sa laboratoryo sa BFAR ug sa lokal nga buhatan sa agrikultura sa Negros Oriental. Gipasidan-an ang publiko nga likayan sa pagpanguha, pagpanginhas, pagbaligya, ug pagkaon sa tanang matang sa shellfish ug Acetes sp., nga mas nailhan isip “alamang”, gikan sa maong lugar.
Apan, klarong gipahibalo sa advisory nga ang isda, nokus, kasag, ug hipon luwas pa nga kan-on basta lang kini limpyo og maayo ug kuhaan sa sulod nga mga lawas (entrails) una lutuon o kaunon.
Nagpadayon ang BFAR ug ang lokal nga panggamhanan sa pagmonitor sa kahimtang sa baybayon aron mapanalipdan ang panglawas sa publiko ug ang pangunabuhian sa industriya sa kabibi. Ang kooperasyon sa katawhan sa pagtuman sa maong tambag giingong dako og gikatabang sa paglikay sa posibleng kadaot sa lawas.
Source: BFAR-7
I via Renante Socia Lada