Dipolog: 1st Provincial Sanitation Summit gipahigayon

Adunay 228 sulod sa 691 ka barangay sa Zamboanga del Norte ang Zero Open Defecation (ZOD) Barangays o ang aduna nay mga sanitary toilets o pansayan.

Kini ang nasayran gikan ni Provincial Health Officer Dr. Eduardo Luayon, atul sa 1st Provincial Sanitation Summit, Nobyembre 30, Huwebes.

Ang maong kalihukan gitambongan sa mga Mayor, Sanitation Inspectors ug Municipal Health Officers sa probinsya nga gipahigayon sa Plenary Hall, 2nd Floor, Zamboanga del Norte Convention and Exhibition Center ning dakbayan sa Dipolog nga gipasiugdahan sa kagamhanang probinsyal pinaagi sa Provincial Health Office.

Samtang ang nahimo usab nga ZOD Municipalities mao ang Liloy, Labason, Godod, Salug ug Polanco. Mitambong nga mayor mao sila si Kalawit Mayor Salvador Antojado ug Salug Mayor William Maribojoc. Anaa usab si Ex-Officio Member and PCL President sa Sangguniang Panlalawigan, Hon, Venus Uy, DILG Provincial Director Oliver Ombos ug uban pa. Gidasig sa Provincial Health Office ang ubang mga mayor nga tutukan na ang pagpatuman na sa ZOD alang sa maayong panglawas. 

(Source: Provincial Government of Zamboanga del Norte Facebook page)