Gipanghatag sa Department of Agrarian Reform o DAR Zamboanga del Norte ang 192 ka ready-to-lay nga manok ngadto sa mga agrarian reform beneficiaries o ARBs sa El Paraiso Multi-Purpose Cooperative sa Barangay El Paraiso, La Libertad, Zamboanga del Norte, isip kabahin sa Chicken Egg Production and Marketing project ubos sa Partnership Against Hunger and Poverty o PAHP.
Apil sa nadawat sa kooperatiba ang 4 ka sets sa egg machines, 33 ka sako nga adunay 50 kilos nga feeds matag usa, 200-litro nga blue drum, weighing scale, egg trays ug uban pang starter kits alang sa poultry enterprise.
Gipasiugda ni DAR Zamboanga del Norte Provincial Agrarian Reform Program Officer II Daisy Dell Suan Digamon nga padayon ang ahensya sa pagpalig-on sa panginabuhian ug kaayohan sa mga mag-uuma ug agrarian reform beneficiaries. Gilauman usab nga magpadayon ang proyekto bisan human sa duha ka tuig nga implementation period, ilabina kay nagsugod na og pangitlog ang mga manok.
Gitambongan ang turnover nila La Libertad Mayor Ricky R. Cuenca, Barangay El Paraiso Chairman Felix G. Ligutom, Cooperative Board of Directors Chairperson Conita A. Gairanan ug mga miyembro sa kooperatiba, samtang gipadagan ang kalihokan sa DAR Municipal Office ubos ni MARPO Florian B. Tolentino ug ARPO I Carol Lyn Z. Darasin.(JENIFFER JR. DELICA)
Source: DAR Zamboanga del Norte Province