Pinaagi sa Kuyog Ta Health Care Program sa provincial government sa Zamboanga del Norte, 18 ka pasyente ang nakadawat og libreng operasyon samtang kapin 200 ang nakapahimulos sa libreng konsultasyon sa Zamboanga del Norte Medical Center (ZNMC).
Kabahin kini sa paningkamot sa administrasyon ni Governor Darel Dexter T. Uy nga mapaduol sa mga residente ang espesyalistang serbisyo panglawas, ilabina alang sa mga pasyenteng adunay limitado nga pinansyal nga kapasidad alang sa medical consultation ug operasyon.
Pinaagi sa programa, regular nga mobisita matag bulan sa ZNMC ang mga espesyalistang doktor gikan sa Cebu, nga naghatag og serbisyo sa mga kaso nga nanginahanglan og espesyalistang pag-atiman.
Gipangunahan ang medical mission nila ni Dr. Jonathan Navarro, Hepatobiliary and Pancreatic Surgeon ug Liver Transplant Specialist; Dr. Imeldo Gamallo, Oncologist ug General Surgeon; ug Dr. Julius Kette Espinas, Anesthesiologist, uban sa suporta ni ZNMC Hospital Administrator Dr. Esmeralda Nadela.
Lakip sa mga kaso nga ilang giatiman ang goiter o thyroid mass, hernia, breast mass, gallbladder problems, tumors ug cysts, liver ug pancreatic cases, cancer cases ug uban pang general surgery cases.
Usa sa nakapahimulos sa libreng operasyon si Conie M. Abing, 42, taga-Purok San Jose, Barangay Sicayab, Dipolog City, nga gioperahan alang sa goiter.
Samtang si Geralyn B. Soliva, 45, taga-Katipunan, Zamboanga del Norte, nakapahimulos usab sa libreng konsultasyon alang sa iyang goiter.
Matud ni Herdina Gallegos, nangulo sa Medical Team sa probinsya, dakong kahupayan alang sa mga pasyente ang maong programa, ilabina kadtong dugay nang nag-antos sa ilang mga balatian apan adunay kalisod sa pagpa-check-up ug pagpaopera.
Giawhag usab ni Gallegos ang publiko nga dili maglangan sa pagpacheck-up kung adunay mabantayang bukol, hubag, kasakit o uban pang dili normal nga sintomas aron masusi ug matambalan dayon.(IKEN B. GULLEM)
Source: Zamboanga del Norte Provincial News Network