Direkta nga nakabenepisyo ang 15 ka panimalay sa Barangay Potol sa usa ka ₱225,000 nga livelihood project nga gilunsad ubos sa Sustainable Livelihood Program sa Department of Social Welfare and Development (DSWD).
Ang proyekto, nga gipahimuslan sa Potol Enhanced Gasang Bahandianon sa Umahan (EGBU) SLPA, nagpunting sa itik farming ug balut production isip dugang panginabuhian sa mga benepisyaryo.
Nakaangkon ang grupo og 506 ka itik nga gilaumang makaproduce og dili moubos sa 300 ka itlog kada adlaw, aron matubag ang panginahanglan sa balut sa Dapitan, Dipolog, ug kasikbit nga mga lugar.
Sumala sa DSWD, tumong sa programa ang paghatag og lig-on ug malungtarong kita sa mga pamilya pinaagi sa organisadong panginabuhian.
Nahimong posible ang proyekto pinaagi sa suporta gikan sa nasyonal ug lokal nga panggamhanan, lakip ang administrasyon ni Mayor Evelyn “Belen” Uy, kinsa nagpahayag nga dako kini’g ikatabang sa pagpalambo sa kita sa mga benepisyaryo.
Gilauman nga pinaagi sa maong inisyatiba, mas mapalig-on ang panginabuhian sa mga pamilya ug mapauswag ang lokal nga produksyon sa pagkaon sa siyudad.(IKEN B. GULLEM)
Source: City Government of Dapitan