Dili tiaw ang gibati nga kalipay sa 1,420 ka mga mag-uuma ug mananagat gikan sa duha ka dakbayan sa Dipolog ug Dapitan ug sa 11 ka lungsod ning probinsya kinsa na-apektahan sa hulaw human nakadawat sa P10,000 nga cash isip ayuda ni Presidente Ferdinand “Bongbong” Marcos, Jr.
Ang pagpang-apud apud sa Presidential Assistance for Farmers, Fisherfolks and Families gihimo sulod sa Sindangan National Agricultural School, lungsod sa Sindangan, Hunyo 25 nga gitambungan mismo ni Governor Rosalina “Nanay Nene” Jalosjos, Provincial Administrator Wilberth “Jojo” Magallanes, Presidential Staff Officer III Aleo Roy delos Santos, 3rd District Board Member Conkee Buctuan ug Agricultural Program Coordinating Officer George Vallente sa Department of Agriculture Region 9.
Sila si Maya Gorabot, taga Barangay Carang, dakbayan sa Dapitan, Alice Erojo sa Poblacion, Tampilisan ug Letecia Bastillada sa Situbo, Tampilisan ang mipaabot sa ilang pagpasalamat ngadto ni Presidente Marcos ug ni Governor Jalosjos sa maong ayuda tungod kay dako na kini’g ikatabang alang sa ilang panguma.
Si Governor Jalosjos, sa iyang mensahe iyang gipaambit ang iyang kasinatian isip usa ka mag-uuma diin dili masayon ang trabaho niini.
Dugang sa inahan sa probinsya nga kini nga ayuda dili lamang temporaryo nga kaluwasan kondili usa ka lakang sa malungtaron nga kalambuan.
Mipaabot sa iyang dako’ng pagpasalamat si Governor Jalosjos ngadto ni Presidente Marcos kinsa naglantaw sa kaayuhan sa mga mag-uuma ug mananagat ug dako na kini’g ikatabang alang sa ilang kapanginabuhian.
Samtang si Provincial Administrator Jojo Magallanes sa iyang mensahe ang nagpasalamat usab ni Presidente Marcos ug nagkanayon nga posible madugangan ang maong kantidad kung na-aprubahan sa mga miyembro sa Sangguniang Panlalawigan ang rekomendasyon sa Provincial Disaster Risk Reduction and Management Office sa pagdeklarar nga State of Calamity sa probinsya gumikan sa nasinati niini nga hulaw sa nakalabay’ng mga bulan.
Si Mr. Vallente sa rehiyonal nga buhatan sa Department of Agriculture nanghinaut nga ipahiluna sa pag-gamit sa mga mag-uuma ang maong kantidad ug dili iwaldas.
Nasayran nga ang mga mag-uuma ug mananagat kinsa nakadawat sa maong ayuda nagagikan sa dakbayan sa Dipolog ug Dapitan, lungsod sa Baliguian, Kalawit, Katipunan, Labason, Leon B. Postigo, Rizal, President Manuel Roxas, Salug, Sindangan, Siocon ug Tampilisan.
Kini gitambungan usab ni Mayor Nilo Florentino Sy sa Sindangan, Mayor Runie Jamora sa Leon B. Postigo, Atty Ivan Patrick Ang, Vice Mayor Boboy Jauculan sa Tampilisan, Vice Mayor Merly Nasugbu sa Kalawit ug Mr. JJ Jalosjos.
Kahibaloan nga ang pag-ila sa mga benepisaryo niini gihimo kini pinaagi sa buhatan sa Office of the Provincial Agriculturist sa pagpangulo ni Ms. Maybel Bustaliño.
(Source: PIC-MBMontederamos, Julius Jaictin)