Sa sulod lamang sa pipila ka adlaw human sa sunog nga miigo sa La Vista Area, 13 ka pamilya nga nawagtangan ug panimalay nakadawat dayon og tabang gikan sa probinsyal nga gobyerno ubos ni Gov. Darel Dexter T. Uy.
Labing naapektuhan ang 11 ka pamilya nga hingpit nga nasunogan, nga nakadawat og ₱10,000 matag usa, samtang ang duha ka pamilya nga partially damaged ang balay nakadawat og ₱5,000.
Gidugangan pa kini og food packs gikan sa Department of Social Welfare and Development aron masiguro nga adunay pagkaon ang mga apektadong pamilya samtang nag-ayo pa sila sa ilang kahimtang.
Nahimong kabahin ang distribusyon sa mas dako nga programa sa lungsod, lakip ang medical outreach, nga nagpakita sa paningkamot sa gobyerno nga dali matubag ang panginahanglan sa mga biktima sa kalamidad.
Sumala sa mga opisyal, ang paspas nga paghatag og tabang maoy yawe aron makatabang sa mga pamilya nga makabangon ug makasugod pag-usab.(IKEN B. GULLEM)
Source: Zamboanga del Norte Provincial News Network