Nagpadayon ang Ayuda para sa Kapos ang Kita Program (AKAP) sa ikaduhang adlaw sa pagpang-apod-apod sa pinansyal nga ayuda sa mga residente sa Dapitan City, nga gipahigayon sa Dapitan City Cultural and Sports Center, kaniadtong Oktubre 21, 2025.
Matag benipisyaryo nakadawat ug ₱3,000 nga pinansyal nga ayuda ubos sa programa sa Department of Social Welfare and Development (DSWD), nga gikatakdang makatabang sa ilang adlaw-adlaw nga panginahanglan.
Ang maong kalihokan personal nga gitambongan ni 1st District Congressman Roberto “Pinpin” Uy, Jr., nga mipabutyag sa iyang suporta ug mipaabot tabang sa mga benipisyaryo. Gikauban usab niya sila 1st District Board Member Patrick B. Chan ug mga konsehal sa siyudad nga sila Raul Carreon, Bienvenido Dini-ay, ug Alexandra Judith P. Meily.
Nagpahayag usab sa ilang dakong pasalamat ang mga nakadawat sa maong tabang ug sa paningkamot ni Congressman Pinpin Uy, uban ang suporta ni Governor Darel Dexter Uy, City Mayor Evelyn “Belen” Uy, ug uban pang lokal ug probinsyal nga mga opisyal, sa padayon nga pagpaabot sa serbisyong tinuoray para sa katawhan.(Iken B. Gullem)
Source: City Government of Dapitan