Nakadawat na sa ilang unang pinansyal nga suporta ang kapin sa katunga sa 465 ka benepisyaryo sa Special Program for Employment of Students (SPES) sa Probinsyal nga Panggamhanan sa Zamboanga del Norte, nga makatabang sa ilang pang-eskwela ug sa pagpagaan sa gastohon sa ilang mga pamilya.
Gihimo ang unang payout niadtong Miyerkules, Hulyo 15, sa Provincial Treasurer’s Office, diin ang matag benepisyaryo nakadawat og ₱7,670, katumbas sa 60 porsyento sa ilang kinatibuk-ang suhol alang sa 20 ka adlaw nga pagtrabaho.
Gipangulohan sa Provincial Employment Service Office (PESO), ubos sa pagdumala ni Acting Provincial Administrator ug PESO Manager Charmie A. Yu, ang payout isip kabahin sa padayon nga implementasyon sa SPES sa probinsya.
Ang nahibiling 40 porsyento sa suhol pagadawaton pa sa mga benepisyaryo gikan sa Department of Labor and Employment (DOLE), subay sa salary-sharing scheme sa programa.(IKEN B. GULLEM)
Source: Zamboanga del Norte Provincial News Network