DAVAO CITY β Giangkon sa usa ka babaye nga taga-Bunawan, Davao City ngadto sa kapulisan nga gimugna lamang niya ang report bahin sa usa ka holdap human niya nagasto ang kadaghanan sa kuwarta nga iyang giingong nakuha sa mga tulisan.
Sumala sa kapulisan, mitaho ang babaye nga gi-holdap kuno siya sa duha ka lalaki nga nagsakay og motorsiklo samtang naglakaw pauli niadtong Hunyo 6. Matud pa niya, nakuha sa mga suspek ang P7,000 nga iyang gidala.
Tungod niini, gilusad sa mga awtoridad ang hot pursuit operation ug gisusi ang mga CCTV footage sa lugar aron mailhan ug madakpan ang giingong mga suspek.
Apan sa resulta sa imbestigasyon, walaβy nakitang ebidensya ang kapulisan nga nagpamatuod nga adunay nahitabong holdap o naglungtad ang mga giakusahang suspek.
Sa dihang giatubang sa mga imbestigador ang babaye sa ilang mga nadiskobrehan, miangkon kini nga wala gayod mahitabo ang giingong krimen. Matud pa niya, gimugna lamang niya ang maong istorya human niya magasto ang gibana-banang P6,000 ug nahadlok nga mahibal-an kini sa iyang bana.(Camille Santos Naraga)(Source: Contributed)