DAVAO CITY – Gibutyag sa inisyal nga imbestigasyon sa Bureau of Fire Protection (BFP) nga daan na nga linya sa kuryente ang gituohang sinugdanan sa kalayo nga milamoy sa usa ka balay sa 575 Leon Maria Guerrero Street, Barangay 30-C, Davao City.
Sumala sa report sa kapulisan, ang nasunog nga balay gipanag-iyahan ni Emilio Miguel Uy, 66 anyos. Nagsugod ang sunog bandang alas 3:14 sa kaadlawon, Biyernes, Enero 2, 2026.
Gideklara sa mga bombero nga under control ang kalayo bandang alas 3:59 sa buntag, ug fire out bandang alas 5:03 sa buntag.
Sa pagkakaron, wala pa matino sa mga bombero ang kantidad sa danyos nga nahimo sa sunog. (Camille Santos Naraga)(Source: Contributed)