Malampusong nadakpan sa Davao de Oro Police Provincial Office ang usa ka street-level nga personalidad nga nalambigit sa iligal nga droga, nailhan sa alyas nga “Broder,” atol sa usa ka buy-bust operation niadtong Biyernes sa gabii sa Barangay Bagong Silang, Maragusan. Ang operasyon gipahigayon pinaagi sa hiniusang paningkamot sa Maragusan Municipal Police Station, Provincial Drug Enforcement Unit (PDEU-DDOPPO), ug sa 1st Davao de Oro Provincial Mobile Force Company (1st DDOPMFC).
Ang hiniusang operasyon, nga gipahigayon bandang alas 9:39 sa gabii, misangpot sa pagkasakmit sa duha ka (2) ka sachet sa gituohang shabu ug sa gimarkahang kwarta nga gigamit sa buy-bust gikan sa suspek. Ang panaghiusa sa tulo ka yunit nagpakita sa lig-on nga dedikasyon sa Davao de Oro Police Provincial Office sa pag-atubang sa problema sa iligal nga droga sa lebel sa komunidad.
Ang suspek anaa na karon sa kustodiya sa kapulisan ug atubangon ang mga kasong paglapas sa Seksyon 5 ug 11 sa Republic Act 9165, o ang Comprehensive Dangerous Drugs Act of 2002. .(Camille Santos Naraga)(Source: Contributed)