DAVAO CITY — Mamahimong makatrabaho na ang mga senior citizen sa dakbayan human sa pagpirma sa usa ka Memorandum of Agreement (MOA) tali sa City Government of Davao, Department of Labor and Employment (DOLE) XI, ug McDonald’s Philippines kagahapon, Setyembre 9, 2025.
Ubos sa kasabutan, mag-hire ang McDonald’s og mga senior citizen alang sa 18 ka branches niini sa Davao City sugod karong tuiga. Ang inisyatibo nagtinguha nga hatagan og oportunidad ang mga senior citizen nga makapadayon sa aktibong partisipasyon sa komunidad ug makadugang kita alang sa ilang pamilya.
Sa pirmahanay sa MOA, mitambong sila DOLE XI Regional Director Randolf Pensoy, Tess Domingo, Director for Talent Acquisition, HR Business Partnering & People System sa Golden Arches Development Corp., Councilor Enzo Villafuerte nga mirepresentar kang Acting Mayor Sebastian Duterte, ug Councilor Diosdado Angelo Mahipus. (Camille Santos Naraga)(Source: Contributed)