DAVAO CITY – Usa ka Philippine Eagle (Pithecophaga jefferyi) ang nasaksihan pag-usab sa Mt. Sinaka atol sa ginahimong monitoring niadtong Nobyembre 4 hangtod 7, 2025, nga nagtimaan sa iyang pagbalik human sa duha ka tuig nga pagkawala.
Sumala sa mga eksperto, nakita ang agila nga nagalupad sa daplin sa lasang, ug posible nga ang iyang kawad-on sa miaging mga tuig maoy resulta sa pagpangita og pagkaon, kompetisyon sa teritoryo, ug natural nga paglapad sa mga batan-ong agila (juvenile dispersal).
Ang Philippine Eagle, nga giila nga critically endangered, padayon nga nag-atubang og hulga tungod sa pagkalbo sa kalasangan, pagpangayam, ug pagkawala sa puy-anan. Ang Mt. Sinaka, nga usa sa mga key biodiversity areas sa Cotabato nga adunay sukod nga 1,500 hangtod 2,000 ka ektarya, nagpabilin nga importante nga habitat alang sa pagpangitlog, pagpakaon, ug mga programa sa konserbasyon sa maong langgam nga pambansang simbolo, lakip na ang ubang nangalisdang mga espesye.(Camille Santos Naraga)(Source: Contributed)