Naangol ang usa ka lalaki human siya gipusil sa wala mailhing mga armado sa daplin sa National Highway sa Purok Gemelina, Barangay Kingking, Pantukan, Davao de Oro, pasado alas-12 sa udto niadtong Hunyo 25, 2026.
Sumala sa Pantukan Municipal Police Station, gikan pa ang biktima sa graduation ceremony sa Kolehiyo ng Pantukan uban sa iyang pamilya ug paingon na untang mosakay sa usa ka dalag nga Suzuki minivan sa dihang kalit siyang gipusilan sa mga suspek nga miabot sakay sa usa ka abuhon nga minivan nga walay plaka.
Gituohang .45-caliber nga pusil ang gigamit sa mga suspek sa pagpabuto og makadaghang higayon sa biktima sa wala pa sila mikalagiw padulong sa wala pa mailhing direksyon.
Naigo ang biktima og upat ka bala sa nagkadaiyang bahin sa lawas ug gidala dayon sa Davao de Oro Provincial Hospital–Pantukan (DDOPH-Pantukan) alang sa tambal. Sumala sa kapolisan, lig-on na ang iyang kahimtang.
Narekober sa mga imbestigador sa crime scene ang upat ka basiyo sa bala ug usa ka fired bullet.
Nagpadayon ang hot pursuit operation ug imbestigasyon sa kapolisan aron mailhan ug madakpan ang mga responsable sa pagpamusil.(Camille Santos Naraga)(Source: Pantukan PNP)