Davao City – Patay ang usa ka suspetsadong kawatan human nga misukol sa mga sakop sa Ecoland Police Station sa pagpanguna ni Station Commander Police Major Rosario Aguilar.
Mihimo og hot pursuit operation ang kapulisan human misumbong ang usa ka laborer nga si Rey Garbo Gulane 45-anyos taga Purok 22, Bareles St., Caparida Compound, Brgy 76-A, Davao City batok sa usa ka lalaking naka suot og black sando og hoody jacket.
Saysay ni Gulane nga gikawat sa suspek ang iyang blue Trinx mountain bike kantidad og P20,000 pesos, Vivo android cellphone nga tag P4,000.00, usa ka keypad nga cellphone, relo ug cash nga P1,000.
Sa dihang nakita sa mga pulis ang suspek sa ngit-ngit nga lugar sa coastal road kalit silang gipabuthan niini.
Mibalos ang mga pulis ug naigo ang suspek nga daling gidala sa Southern Philippines Medical Center (SPMC) apan gideklarang dead on arrival sa attending physician.
Narekober sa crime scene ang usa ka .38 revolver nga may duha ka mga bala ug ang mountain bike sa biktima nga gikawat sa suspek. (Camille Santos Naraga)
(Source – PRO XI)