DAVAO CITY — Duha ka High Value Targets sa illegal nga droga ang nadakpan sa drug buy-bust operation nga gihimo sa Regional Special Enforcement Team–Davao City ug Seaport Interdiction Unit–Toril sa PDEA-XI sa Dakudao Compound, J.P. Laurel Avenue, Lanang, Davao City, bandang alas-2:50 sa hapon, Disyembre 1, 2025.
Giila ang mga suspetsado nga sila alyas “Ric,” 44 anyos, residente sa nasangpit nga lugar, ug alyas “Jack.”
Sumala sa ulat sa PDEA-XI, si alyas Ric ang nakigtransaksiyon sa poseur buyer pinaagi sa pagbaligya og vape nga adunay sulod sa gituohang marijuana oil sa kantidad nga ₱4,000, nga maoy hinungdan sa iyang pagdakop.
Nakuhaan pa ang duha og 5 ka vape units nga adunay gituohang marijuana oil; 9 vacuum-sealed plastic sachets nga adunay sulod sa gituohang marijuana nga moabot og 455 grams; ubay-ubay nga transparent sachets nga adunay pinaugang dahon sa marijuana; ug 6 plastic sachets nga adunay gituohang shabu nga mitimbang og 70 grams, apil ang drug paraphernalia.
Gibanabana sa PDEA-XI nga ₱554,600 ang kantidad sa tanang nakumpiskar nga illegal nga droga.
Ang operasyon adunay koordinasyon sa City Mobile Force Company sa Davao City Police Office. (Camille Santos Naraga)(Source: Contributed)