Lima ka mga gidudahang nalambigit sa iligal nga droga ang nasikop sa hiniusang operasyon sa Philippine Drug Enforcement Agency Regional Office 11 (PDEA RO11), National Bureau of Investigation–Southeastern Mindanao Regional Office (NBI-SEMRO), ug Pantukan Municipal Police Station sa Barangay Bongabong, Pantukan, Davao de Oro.
Sa buy-bust operation, narekober sa mga operatiba ang lima ka pakete sa gidudahang shabu nga adunay gibanabanang gibug-aton nga 85 gramos. Gisundan kini sa hot pursuit operation batok sa usa ka suspek nga nakalingkawas, diin nadakpan usab kini ug narekober ang dugang 280 gramos nga gidudahang shabu, usa ka .45 caliber nga pistola, ug nagkadaiyang drug paraphernalia.
Base sa banabana sa mga awtoridad, mokabat sa kapin ₱2.4 milyon ang kantidad sa tanang gidudahang shabu nga nasakmit sa maong operasyon.
Ang mga nadakpan anaa na karon sa kustodiya sa mga otoridad ug giatubang sa kasong paglapas sa Republic Act No. 9165 o Comprehensive Dangerous Drugs Act of 2002 ug Republic Act No. 10591 o Comprehensive Firearms and Ammunition Regulation Act.(Camille Santos Naraga)(Source: PDEA)