DAVAO CITY – Gipaubos sa Philippine Drug Enforcement Agency (PDEA) sa pagsunog ang mga iligal nga droga nga nagkantidad og ₱16.08 bilyon, Huwebes, Oktubre 9, 2025, sa pasilidad sa Integrated Waste Management Inc. nga nahimutang sa Trece Martires City, Cavite.
Gitambongan ang kalihokan ni House Committee on Dangerous Drugs Chairperson Rep. Jonathan Keith T. Flores, Dangerous Drugs Board Chair Oscar F. Valenzuela, PDEA Director General Undersecretary Isagani R. Nerez, PNP Acting Chief Lt. Gen. Jose Melencio C. Nartatez, ug uban pang mga opisyal.
Kapin sa 2.9 toneladang solid ug liquid nga droga—lakip ang shabu, marijuana, cocaine, ecstasy, ug ubang substansya—ang gisunog pinaagi sa thermal decomposition. Apil sa mga gipaubos mao ang kapin 1.4 milyong gramo nga shabu nga nasakmit sa Subic, Zambales niadtong Hunyo.
Gipasiugda ni Undersecretary Nerez nga gihimo kini nga proseso sa publiko aron mapakita ang transparency ug malikayan ang gitawag nga drug recycling. Kini ang ikaduhang pinakadakong drug destruction sa kasaysayan sa Pilipinas, sunod sa ₱19.9 bilyon nga pagsunog niadtong 2023.
Sukad gisugdan ni Nerez ang iyang termino walo ka bulan ang milabay, nakahimo na ang PDEA og 14 ka destruction activities sa tibuok nasud, nga nakapapas og halos ₱33 bilyon nga kantidad sa iligal nga droga.(Camille Santos Naraga)(Source: Contributed)