DAVAO CITY – Human sa ilang pagbisita sa Cebu, miadto ang LGU Digos City Team sa Davao Oriental aron personal nga ihatag ang ayuda sa mga komunidad nga apektado sa linog. Nagdala ang grupo og bugas, de-lata, ready-to-eat food, ug mga sinina alang sa mga residente nga naapektuhan sa katalagman.
Nagpasalamat si Governor Nelson L. Dayanghirang sa katawhan sa Digos City, ilabina kang Mayor Josef Fortich Cagas, alang sa ilang suporta ug tabang nga gihatag sa probinsya.
Mahinumduman nga ang lungsod sa Manay, Davao Oriental, mao ang pinakagrabeng naapektuhan sa magnitude 7.6 nga linog nga nahitabo niadtong Biyernes, Oktubre 10. Sumala sa PDRRMO report panahon sa pagbisita sa Digos team, 752 ka balay ang naguba samtang 10,629 ang nagkadipirensya o nagkabitak tungod sa kusog nga linog. Tulo ka kinabuhi ang nawala sa maong trahedya. (Camille Santos Naraga)(Source: Contributed)