DAVAO CITY – Nagpagawas ang Department of Environment and Natural Resources (DENR) Region 12 og Notice of Violation ug Show Cause Order batok sa organizer sa “Holonman Aquathlon 2025” nga gipahigayon sa Lake Holon Campsite, Barangay Salacafe, T’boli, niadtong Oktubre 26, 2025.
Ang maong event, nga gi-organisa sa Body Kinetix Event Services and Management uban sa koordinasyon sa Municipal Government sa T’boli, naglakip og langoy ug trail running sa palibot sa Lake Holon. Apan, nasuta sa Protected Area Management Office sa Allah Valley Protected Landscape (PAMO-AVPL) nga wala kini makakuha og permit gikan sa Protected Area Management Board (PAMB).
Gibutyag sa DENR nga ang viral video sa maong kalihokan nakapukaw og kabalaka sa publiko tungod sa posibleng epekto niini sa protected area. Gipangayo usab sa ahensya ang tubag sa lokal nga gobyerno sa T’boli bahin sa ilang pagtugot sa aktibidad bisan walay klarong permiso.
Sumala sa DENR-12, ang maong lihok supak sa Republic Act No. 11038 o Expanded National Integrated Protected Areas System (E-NIPAS) Act of 2018, nga nagmando nga kinahanglan og pagtugot gikan sa PAMB ang bisan unsang kalihokan sulod sa protected areas aron maprotektahan ang kinaiyahan ug matuman ang mga polisiya sa konserbasyon.(Camille Santos Naraga)(Source: Contributed)(Source:DENR Soccsksargen)