DAVAO CITY – Narekord sa Philippine Drug Enforcement Agency (PDEA) Region 9 ang 27 ka mga driver sa Public Utility Vehicles (PUV) nga positibo sa paggamit og illegal nga droga atol sa Oplan Harabas nga gipahigayon sa lain-laing transport terminals sa rehiyon.
Gibuhat ang simultaneous random drug testing sa mga terminal sa Zamboanga City, Dipolog City, Pagadian City, ug Ipil, Zamboanga Sibugay, diin sa 1,259 ka gi-drug test, 27 ang nagpositibo. Lakip sa mga resulta, pito ang gikan sa Zamboanga del Sur, usa sa Zamboanga del Norte, unom sa Zamboanga Sibugay, ug napulo’t tulo sa Zamboanga City.
Girekomenda sa PDEA ngadto sa Land Transportation Office (LTO) ang temporaryong pagkumpiska sa lisensiya sa mga nagpositibo samtang padayon ang confirmatory test ug imbestigasyon sa kaso.
Ang Oplan Harabas gipahigayon aron masiguro ang kaluwasan sa mga pasahero labi na sa panahon sa Kalag-Kalag, ug aron mapugngan ang paggamit sa illegal nga droga sa sektor sa transportasyon.(Camille Santos Naraga)(Source: PDEA-IX)