DAVAO CITY – Gikatakdang magsugod ang Davao Public Transport Modernization Project o DavaoBus sa pilot operations niini sa 2027, nga naghatag og moderno ug episyenteng sistema sa transportasyon sa Davao City gamit ang bus-based network.
Gisusi ni Transportation Secretary Vince Dizon ang konstruksyon site sa Calinan District subay sa mando ni Presidente Ferdinand Marcos Jr. nga paspasan ang dugay nang nadugayang proyekto. “Usa kini ka game-changer ug dapat mahimong modelo para sa tibuok nasud,” matod ni Dizon.
Ang inisyal nga rota sa DavaoBus magsugod sa Catalunan Pequeño paingon sa Sasa, nga moagi sa mga dagkong lugar sama sa Ulas, Matina, Bankerohan, Quirino, Bajada, Lanang, ug Buhangin.
Uban sa rollout, itukod usab sa Davao ang pinakaunang Bus Driving Academy sa tibuok Pilipinas aron mapaayo ang pagbansay sa mga drayber ug mapalambo ang seguridad sa mga pasahero. Gibug-aton ni Dizon ang panginahanglan og propesyonal nga mga drayber nga masayud sa safety standards ug makahimo og kasaligan nga serbisyo.
Ang 672-kilometer nga DavaoBus system nagtinguha nga bag-uhon ang pampublikong transportasyon ug mamahimong sumbanan sa nasudnong lebel.(Camille Santos Naraga)(Source: Contributed)