DAVAO CITY – Nagpadayon ang Davao City Government sa pagpakita sa pakig-uban ug kalooy pinaagi sa pagpadala og relief assistance ngadto sa mga biktima sa linog sa Cebu Province.
Niadtong Oktubre 1, 2025 (Miyerkules), giandam sa mga empleyado ug volunteers sa City Mayor’s Office ug City Disaster Risk Reduction and Management Office (CDRRMO) ang daghang food packs, inuming tubig, ug tambal alang sa mga pamilya nga naapektohan sa linog.
Nakargahan na ang mga trak sa relief goods ug nakatakdang molarga alas 5 sa buntag sa Oktubre 2, uban ang mga rescue, medical, ug logistics teams nga motabang sa on-site operations sa Cebu.
Sumala sa CDRRMO, ang misyon naglakip sa paghatag og immediate humanitarian aid, medical assistance, ug technical support sa mga ahensya nga nagdumala sa mga evacuation center.
Ang Davao City usa sa unang mga lokal nga pangagamhanan sa Mindanao nga mipadala og team ug ayuda aron motabang sa mga naapektohan sa kalamidad, subay sa direktiba ni Mayor Sebastian “Baste” Duterte nga magpakita og solidaridad ug tinuod nga serbisyo publiko. (Camille Santos Naraga)(Source: Contributed)