DAVAO DEL NORTE – Patay ang usa ka dalaga human kini makaplagang walay kinabuhi sulod sa ilang panimalay sa Purok 3-A, La Filipina, Tagum City alas-5:00 sa buntag, Miyerkules, Hulyo 9, 2025.
Gikilala ang biktima nga si Sophia Maria Coquilla, 19 anyos, dalaga, estudyante sa University of the Philippines, ug residente sa maong lugar.
Sumala ni P/LtCol Frederick Deles, adunay kapin 20 ka samad dinunggaban ang lawas sa biktima nga maoy hinungdan sa iyang hinanaling kamatayon.
Dugang pa ni Deles, tulo ngadto sa upat ka mga suspetsado ang kasamtangang giimbestigahan. Nasayran nga bag-o lang nakauli ang biktima gikan eskwela ug nag-inusara sa iyang lawak, samtang ang iyang ginikanan anaa sa laing kwarto ug wala nakamata sa dihang nahitabo ang krimen.
Pangawat ang giilang motibo sa krimen, base sa inisyal nga imbestigasyon sa kapulisan, tungod kay nawala ang mga personal nga gamit sa biktima sama sa cellphone, ATM card, tablet, ID cards, ug uban pa.
Nakuha sa crime scene ang mga ebidensya nga posible gigamit sa krimen, lakip na ang dumbbell, sundang, ug uban pang mahait nga hinagiban.
Sa pagkakaron, padayon pa ang makuting imbestigasyon sa kapulisan aron madakpan ang responsable sa maong brutal nga krimen.(Camille Santos Naraga)(Source: Contributed)