DAVAO CITY – Nakumpleto na ang konstruksyon sa southbound tunnel sa Davao City Bypass Road Construction Project (DCBCP) human gipahigayon sa Department of Public Works and Highways (DPWH) ang ceremonial breakthrough sa Barangay Waan.
Mitambong sa seremonya ang mga opisyal gikan sa DPWH, Mindanao Development Authority, Embassy of Japan in the Philippines, ug Japan International Cooperation Agency (JICA). Kini nagtimaan nga konektado na ang north ug south ends sa proyekto.
Nahinumdoman nga kaniadtong Abril 2025, nahuman usab ang northbound tunnel portion sa bypass project. Ang duha ka tunnel adunay gitas-on nga 2.3 kilometro matag usa, ug giila kini isip pinakataas nga road mountain tunnel sa tibuok Pilipinas.
Samtang, nagpadayon pa ang kinatibuk-ang 45.5-kilometro nga Davao City Bypass Construction Project nga magdugtong gikan Barangay Sirawan sa Toril, Davao City hangtod Barangay J.P. Laurel sa Panabo City, Davao del Norte.(Camille Santos Naraga)(Source: Contributed)