DAVAO CITY – Mapasigarbohon nga gisaulog sa Davao City ang unang mga kadaugan niini sa nagpadayong Batang Pinoy 2025 National Games nga gipahigayon sa General Santos City.
Si Jian Paul Baulos maoy naghatag sa unang medalya alang sa lungsod human makadaog og bronse medal sa Boys’ 16–17 Aquatics (Swimming) 200 LC Meters event. Nirehistro siya og seed time nga 2:24.38 ug mas gipauswag pa kini sa finals uban sa oras nga 2:18.92.
Samtang si Calvin Quinn Posadas nakakuha sa unang gold medal sa Davao City human modominar sa Judo – 71kg Juvenile Category, nga nagmarka sa usa ka mapahitas-on nga higayon alang sa delegasyon sa siyudad.
Ang mga kalampusan sa duha ka atleta nagpakita sa padayon nga paglambo sa Davao City sa larangan sa youth sports ug sa pagpasalig sa lungsod sa pag-amuma sa kabatan-onang talento.(Camille Santos Naraga)(Source: Contributed)