DAVAO CITY – Gikustodiya karon sa Mandug Police Station 13 si alyas “Amo”, 29 anyos, usa ka aktibong BJMP personnel, uban sa upat ka mga kaubanan human silang madakpan atol sa joint drug buy-bust operation kauban ang mga pulis sa Tactical Support Company (TSC) RMFB 11 niadtong Miyerkules sa kaadlawon, Oktubre 1, 2025, sa Purok 2, Barangay Communal, Buhangin District, Davao City.
Sumala sa inisyal nga report, target sa operasyon si alyas “Amo” nga napalitan sa usa ka poseur buyer og gituohang shabu nga nagkantidad og ₱10,200, hinungdan sa iyang pagkadakop.
Apan, upat pa ka kaubanan niini ang nadakpan usab ug giilang sila nga sila alyas “Ibonie” (31 anyos), “Bienvenido” (33 anyos), “Ariel” (34 anyos), ug “Carlo” (23 anyos) — pawang mga craftsman ug mga residente sa Purok 2, Communal, Davao City.
Sa pag-inspeksyon, nakakuha ang mga pulis og duha ka sachet nga adunay gituohang shabu nga mobalor og ₱20,400, ug usa ka Ziploc transparent plastic sachet nga adunay sulod nga gituohang marijuana nga gibanabana og ₱60,000.
Nakuha usab sa mga otoridad ang improvised glass tooter ug lighter nga gituohang gigamit sa paggamit sa droga.
Ang mga suspek karon nag-atubang sa mga kaso kalabot sa paglapas sa Comprehensive Dangerous Drugs Act of 2002 (RA 9165). (Camille Santos Naraga)(Source: Contributed)