DAVAO CITY — Gideklarar nga dead on arrival (DOA) sa ospital ang biktima nga giila sa kapulisan nga si Norodin Sapal, 50 anyos, Treasurer sa Barangay Palanggalan, Carmen, Cotabato Province.
Sumala sa report, naglingkod lang ang biktima sa gawas sa iyang balay sa Sitio Tawagon, Purok 6, Barangay Katidtuan, Carmen niadtong Sabado sa gabii, Nobyembre 8, 2025, sa dihang giduol siya sa duha ka armadong lalaki ug gipusil sa daghang higayon.
Human sa insidente, misakay ang mga suspek sa motorsiklo ug nilayas, samtang gidala dayon sa ospital ang biktima nga gideklarar na lang DOA. Sa crime scene, narekober ang mga basyo sa bala sa .45 pistol.
Gisubay na sa kapulisan ang mga CCTV cameras sa lugar ug padayon ang imbestigasyon aron masuta ang motibo sa krimen. .(Camille Santos Naraga)(Source: Contributed)