DAVAO CITY – Kritikal ang kahimtang sa usa ka babayeng negosyante human mabanggaan sa usa ka truck sa MacArthur Highway, Barangay Lizada, Toril District, Davao City, pasado alas 5:05 sa buntag niadtong Sabado, Nobyembre 1, 2025.
Giila ang biktima nga si alyas “Loida”, 48 anyos, residente sa Manuer Guardian Street, Barangay Daliao ning dakbayan.
Sumala sa imbestigasyon sa Traffic Division sa Toril Police Station 8, nagpadulong sa Binugao, Toril o south direction ang duha ka sakyanan — ang motorsiklo nga gidala sa biktima ug ang truck nga nag-okupar sa inner lane sa kalsada.
Base sa pahayag sa drayber sa truck, kalit lang daw nga nag-full stop ug misulay ug U-turn ang biktima padulong sa kasugat nga linya, hinungdan nga wala na niya malikayi ug nabanggaan kini.
Dali nga girespondehan sa 911 ambulance ang insidente ug gidala ang biktima sa Southern Philippines Medical Center (SPMC) aron tambalan.
Nasuta usab sa kapulisan nga walay naipakitang driver’s license ang drayber sa truck nga giilang si Jedmarlo Tinghil, 24 anyos, residente sa Purok 3, Limbaan, New Corella, Davao del Norte.
Padayon ang imbestigasyon sa mga otoridad kalabot sa maong insidente.(Camille Santos Naraga)(Source: Contributed)