Upat (4) ka sundalo sa Philippine Army ang patay ug usa (1) ang samaran human tambangan sa armadong mga persona nga gituohang sakop sa Dawlah Islamiya–Maute Group sa Barangay Liningding, Munai, Lanao del Norte, niadtong Biyernes sa buntag, Enero 23, 2026.
Sumala sa report, sakay og Toyota Avanza ang mga sundalo ug nagbiyahe human sa usa ka routine marketing operation o pagpamalit og pagkaon sa dihang giatake sila sa mga suspek. Ang ambush nahitabo bandang alas 10:00 sa buntag.
Gilayon nga rumesponde ang mga tropa sa 44th Infantry Battalion (IB) aron makontrol ang kahimtangan ug masiguro ang kaluwasan sa lugar. Ang samarang sundalo gidala dayon sa pinakaduol nga ospital alang sa medikal nga pag-atiman.
Sa kasamtangan, wala pa ipadayag ang mga ngalan sa mga nasawi ug samaran aron tahuron ang ilang mga pamilya ug samtang padayon pa ang imbestigasyon sa insidente.(Camille Santos Naraga)(Source: Contributed