DAVAO CITY – Tulo ka construction workers ang namatay diha-diha dayon human mahulog ang usa ka Elf truck sa Chico River sa Barangay Tocucan, Bontoc, Mountain Province, sayong buntag sa Oktubre 27, 2025.
Sumala sa mga otoridad, ang truck nga sakyanan sa mga trabahante sa Balintaugan Construction padulong unta sa Sadanga, apan nakabunggo kini sa duha ka naka-park nga sakyanan sa kalsada bago kini nahulog sa suba.
Ang Bontoc Operations Center nakadawat sa report mga alas-6 sa buntag. Human sa operasyon sa mga responder, natagbo ang tulo ka lawas sa mga biktima, samtang padayon pa ang search and retrieval operation alang sa uban pang posible nga na-trap o nawala.
Ang mga otoridad padayon sa pag-imbestigar aron mahibal-an ang hinungdan sa aksidente, lakip na ang posibleng pagkabigo sa preno o overloading.(Camille Santos Naraga)(Source: Contributed)