DAVAO CITY – Usa ka 22-anyos nga lalaki ang nadakpan sa Davao City Overland Transport Terminal (DCOTT) sa Candelaria Street, Ecoland, human makuha sa iyang bag ang gituohang pinaugang marijuana ug ubang drug paraphernalia, pasado alas-1:00 sa kaadlawon, Nobyembre 3, 2025.
Nasuta sa mga awtoridad nga nagdala ang suspek og sling bag nga adunay plastic sachet nga may sulod nga marijuana, linikit nga papel nga adunay susamang substansiya, ug vape nga gituohang adunay liquid marijuana.
Gipaila ang suspetsado nga si alyas “Ramonito,” 22 anyos, residente sa Purok San Miguel, R. Castillo Street, Agdao, Davao City.
Dugang sa nakumpiska sa mga otoridad mao ang duha ka improvised glass tooter nga adunay residue sa illegal nga droga, notebook, duha ka lighter, sling bag, ug plastic eyeglasses.
Karon, gikustodiya na sa Ecoland Police Station 15 ang suspek samtang ginaproseso ang kasong isasampa batok kaniya.(Camille Santos Naraga)(Source: Contributed)