DAVAO CITY – Malampusong nadakpan sa kapulisan sa Talomo Police Station ang usa ka suspek sa pagpangawat sulod lamang sa kapin 2 minutos nga response time.
Base sa impormasyon gikan sa XFM Davao ug Talomo PNP, nasayod ang kapulisan sa insidente sa pagpangawat nga nahitabo sa McArthur Highway, Bangkal, Davao City alas 6:40 sa buntag niadtong June 23, 2025, ug dali kining girespondehan.
Sulod lang sa 2 minutos ug 55 segundos, nasikop sa akto ang suspetsado nga giilang si alyas “Joseph”, 28 anyos, taga Tibungco, Davao City. Gawas sa kasong Theft, posible sab kini nga mag-atubang og kaso ilawom sa RA 9165 (Comprehensive Dangerous Drugs Act of 2002), human kini makuhaan og gituohang shabu nga nagkantidad og ₱1,500.
Matod ni PMaj Genesis Oriel, hepe sa Talomo Police Station, kini usa ka pamatuod sa dedikasyon ug kusog sa kapulisan nga dali makatubag sa mga insidente, ug nagpasalig nga ipadayon ang pakigbatok sa kriminalidad aron mamintinar ang kalinaw ug kahapsay sa komunidad. (Camille Santos Naraga)(Source: Contributed)