PICONG, Lanao del Sur — Mokabat sa ₱77.19 milyon nga kantidad sa gidudang smuggled nga mga sigarilyo ang nasakmit sa mga otoridad samtang 14 ka indibidwal ang nadakpan atol sa anti-smuggling operation nga gihimo sa Barangay Liangan, Picong, Lanao del Sur niadtong Hunyo 14, 2026.
Atol sa operasyon, nadiskobrehan sa tulo ka temporaryong imbakan ang 1,803 ka master cases ug 139 ka reams sa nagkalain-laing tatak sa sigarilyo nga gituohang gipalusot sa nasud iligal.
Nakarekober usab ang mga operatiba og usa ka Caliber 7.62 M14 rifle gikan sa maong lugar.
Sumala sa mga otoridad, napakyas sa pagpakita og mga dokumento nga magpamatuod sa legalidad sa mga produkto ang mga nadakpan nga mga suspek.
Upat pa ka indibidwal ang nakaikyas ug padayon pang gipangita sa mga awtoridad.
Gipangulohan sa 1402nd Company sa Regional Mobile Force Battalion (RMFB) 14-A ang operasyon uban sa nagkalain-laing yunit sa kapulisan ug militar, lakip ang Regional Intelligence Division sa Police Regional Office Bangsamoro Autonomous Region (PRO BAR), Criminal Investigation and Detection Group (CIDG), Regional Intelligence Unit 15, Regional Intelligence and Analysis Team, mga yunit sa RMFB 14-A, Philippine National Police–Special Action Force (PNP-SAF), ug Philippine Army.
Matod ni Police Brigadier General Christopher M. Abecia, Regional Director sa PRO BAR, ang malampusong operasyon maoy pamatuod sa lig-on nga koordinasyon sa mga law enforcement agencies sa kampanya batok sa smuggling ug uban pang ilegal nga kalihokan..(Camille Santos Naraga)(Source: Contributed)