MATI CITY, Davao Oriental — Mokabat sa P2.4 milyon nga kantidad sa gidudang shabu ang nasakmit sa mga otoridad atol sa buy-bust operation nga gihimo sa Purok Bayanihan, Barangay Sainz, Mati City niadtong Hunyo 16, 2026.
Gipangulohan sa mga operatiba sa Philippine Drug Enforcement Agency (PDEA) Regional Office XI pinaagi sa Davao Oriental Provincial Office, uban sa Mati City Police Station, ang operasyon nga miresulta sa pagdakop sa usa ka babayeng suspek nga giila lamang sa alyas nga “Jinky,” 45 anyos.
Sumala sa PDEA-XI, nadakpan ang suspek human kini mibaligya og usa ka sachet nga adunay sulod nga gidudang shabu sa kantidad nga P1,000 ngadto sa usa ka undercover operative nga nagpanggap isip poseur-buyer.
Gawas sa gibaligyang ilegal nga droga, nakumpiskar usab gikan sa posesyon sa suspek ang lima ka plastic sachet nga adunay sulod nga gidudang shabu nga may kinatibuk-ang gibug-aton nga 360 ka gramo ug gibanabana nga kantidad nga P2,448,000.
Nasakmit usab sa mga otoridad ang nagkalain-laing drug paraphernalia ug ang marked money nga gigamit sa buy-bust operation.
Sa pagkakaron, giandam na sa mga otoridad ang pagsang-at sa tukmang mga kaso batok sa suspek tungod sa gilapas nga Republic Act No. 9165 o ang Comprehensive Dangerous Drugs Act of 2002.(Camille Santos Naraga)(Source: PDEA XI)