Nagpadayon ang paningkamot sa Provincial Government sa Sultan Kudarat sa pagpalapad sa inclusive healthcare human mapahigayon ang ikatulong hugna sa distribusyon sa prosthetic devices niadtong Nobyembre 20, 2025.
Gihatagan og 128 ka prosthetics ang mga kwalipikadong benepisyaryo, diin 108 niini taga-Sultan Kudarat. Ang uban gikan sa General Santos City, Davao City, Maguindanao, ug duha ka benepisyaryo sa South Cotabato—nagpamatood nga ang serbisyo sa probinsya milukop bisag hangtod sa kasikbit nga mga lugar.
Ang matag prosthetic device gibanabana nga mokantidad gikan ₱30,000 hangtod ₱150,000, depende sa gidak-on, disenyo, ug parte sa lawas nga ilangan ikabutang. Ang tanang gasto gipondohan sa Provincial Government isip suporta sa mga lumolupyo nga adunay physical disabilities.
Sumala ni Governor Datu Pax Ali Mangudadatu, ang inisyatibo kabahin sa mas halapad nga pagselebrar sa Kalimudan Festival 2025, nga nagpunting sa pag-atiman sa mga kabus ug vulnerable sectors pinaagi sa paghatag og mahinungdanong medical assistance.
Pinaagi sa maong programa, padayon nga ginalig-on sa probinsya ang paghatag og oportunidad sa mas maayo nga mobility ug kalidad sa kinabuhi alang sa mga benepisyaryo.(Camille Santos Naraga)(Source: Contributed)