DAVAO CITY — Usa ka tawo ang namatay samtang upat ang nag-antos sa mga samad human mabalingtang ang usa ka pick-up truck padulong sa Bukidnon.
Base sa report sa kapulisan, ang sakyanan gimaneho ni Shane Rey Pay-ao Lauronal, 23 anyos, residente sa Barangay Santo Niño, Tugbok District, Davao City, kauban ang pasahero nga si Junel Omamba Cedeño, 24 anyos, taga Matina Crossing, Davao City.
Natigayon ang insidente niadtong alas 8:45 sa buntag, Nobyembre 9, 2025, sa Sitio Lower Kibalang, Barangay Marilog, Marilog District, Davao City.
Sa inisyal nga imbestigasyon sa Traffic Section sa Marilog Police Station, adunay tulo ka tawo nga nag-hitch sa sakyanan sa Suawan Area, Marilog, nga giila sa kapulisan nga sila Aldrin Beltran Nazareno, 40 anyos, taga Bangkal, Davao City, John Rey Pitugo Lisbo, 35 anyos, taga Catalunan Pequeño, Maria Liza Gemota, 40 anyos, taga Sunrise, Matina, Davao City
Pag-abot sa lugar sa insidente, nawad-an og kontrol ang driver, hinungdan nga nabalingtang ang pick-up padulong sa kasugat nga lane ug natagak sa open drainage.
Gipadala sa ospital ang tanan nga sakay. Gideklarar nga patay si Gemota, samtang ang driver, pasahero, ug duha ka hitchhikers gipangtambalan sa ospital alang sa ilang mga samad. .(Camille Santos Naraga)(Source: Contributed)