DAVAO CITY – Temporaryong gipa-undan sa Department of Social Welfare and Development Field Office XI (DSWD FO XI) ang pagpagawas og Guarantee Letter (GL) alang sa Assistance to Individuals in Crisis Situations (AICS) ug Ayuda sa Kapos ang Kita Program (AKAP) sugod November 30, 2025.
Gipahibalo sa ahensya nga ang suspensiyon sa GL issuance mao’y pagsunod sa memorandum nga gipagula sa DSWD Central Office ug sa Financial Management Guideline No. 53 (2025), nga naglatid sa kinahanglanon sa paghatag ug igong panahon aron maproseso ang tanang bayronon ngadto sa mga accredited Service Providers.
Bisan pa man sa temporaryong paghunong sa pag-isyu og GL, gisiguro sa DSWD XI nga magpadayon gihapon ang paghatag og serbisyo ubos sa AICS ug AKAP, ilabi na alang sa mga indibidwal nga nagkinahanglan og hinabang, bisan og limitado na ang financial assistance nga mahimo nilang ma-extend sa pagkakaron.
Giawhag usab sa DSWD XI ang publiko nga mudangop sa ilang opisina alang sa dugang nga pangutana o klaripikasyon. Mahimo silang kontakon sa 082-227-1964 o bisitahon sa ilang buhatan sa R. Magsaysay Ave. cor. D. Suazo St., Poblacion, Davao City. .(Camille Santos Naraga)(Source: Contributed)