Gimandoan ni Mayor Evelyn “Belen” T. Uy ang tanang empleyado sa City Hall sa Dapitan City nga mosunod sa mga lakang sa pagtipid sa enerhiya, lakip na ang pagpatuman sa upat ka adlaw nga workweek, isip tubag sa nagkataas nga presyo sa enerhiya sa kalibotan.
Gipahibalo kini sa mayor atol sa flag-raising ceremony niadtong Marso 9, 2026, diin iyang giingon nga ang lakang kabahin sa paningkamot sa lokal nga kagamhanan nga mapakunhod ang konsumo sa kuryente sa mga opisina sa gobyerno.
Matod pa sa mayor, ang bag-ong sistema motabang sa pagpalig-on sa operasyon sa mga opisina samtang ginapamenos usab ang paggamit sa kuryente. Lakip sa ipatuman nga mga lagda ang paglangan sa pagpaandar sa aircon hangtod alas-9 sa buntag ug pagpalong niini alas-4 sa hapon.
Giingon usab ni Mayor Uy nga ang pagtaas sa presyo sa enerhiya resulta sa padayon nga krisis sa lana sa kalibotan, nga nakaapekto sa gasto sa kuryente ug gasolina. Tungod niini, gikinahanglan nga magpakita og disiplina ug kooperasyon ang mga empleyado sa gobyerno aron mapadayon ang maayong serbisyo publiko bisan pa sa pagtipid sa enerhiya.
Pinaagi sa maong lakang, naglaum ang City Government sa Dapitan nga makatampo sa responsableng paggamit sa enerhiya samtang nagpadayon ang paghatag og serbisyo sa komunidad.(IKEN B. GULLEM)
Source: City Government of Dapitan