Nasikop sa kapulisan ang usa ka 22 anyos nga dalaga,kinsa nangawat sulod sa tindahan sa Watson Personal Care Phils. Inc nga nahimutang didto sa MGM Square, Rizal Avenue, Barangay Central, ning dakbayan sa Dipolog, mga alas 9:10 sa gabie, niadtong Hunyo 15, 2024.
Ang dinakpan usa 22 anyos, babaye, dalaga ug residente sa North Baybay, Galas, dakbayan sa Dipolog.
Matod sa Security Guard sa maong tindahan nga si Efren Guindoy Alilong nga mga alas 9:30 sa gabi-i nianang adlawa,nitaho sa kapulisan kabahin sa usa ka babaye nga suspek kinsa nangawat ug usa ka kahon sa Enervon Multivitamins sulod sa tindahan.
Diha-diha dayun girespondehan sa duty beat nga si PCpl Ambrocio Dano ang nahisgutang lugar ug pag-abot niini, nakuha gikan sa possession ug control sa suspek ang kinawat nga butang nga adunay sulod nga 30 ka tabletas sa Enervon Multivitamins nga nagkantidad P220.00.
Ang suspek gidala dayun sa Dipolog City Police Station alang sa dokumentasyon ug pagpasaka sa tukmang kaso. (Medalyn U. Borja)
(Source: Dipolog CPS)