Cebu City – Nabiktima sa pagpanglungkab ug pagpangawat ang usa ka dakong mol sa Brgy. Pajo, dakbayan sa Lapu-Lapu gahapon sa buntag.
Mao kini nasayran gikan mismo kang Mayor Junard “Ahong” Chan.
Nahinabi sa media, si Chan miingon nga duha ka tindahan sa alahas sa mol ang gikawatan.
Matod ni Chan, dihang ilang gisusi ang mol wala silay nakitang force entry o gipugos pag-abli aron makasud ang responsable apan pero nianang pagka hapon, nasuta nga dunay gibakbak nga kongkreto sa rooftop padung sa bodega nga gituuhang didto mo agi ang manglungkabay.
Duna say katahap si Chan ug ang mga awtoridad nga didtora sa sud ang kawatan sa wa pa manera ang establisimento.
Hinuon, hangtod sa paghikay ning balita, wala pa matino unsa ug pilay nasakiyo sa kawatan sanglit nagpadayon pa man ang gipahigayon imbentaryo sa tenant ug management sa mol.
Samtang ang kapolisan nagsubay pa kon hain na paingon o hain magtago ang responsable. (Jhon Tadlip/JTY, photo courtesy by Junard Chan Facebook page)
(Source: Lapu-Lapu City Public Information Office)