Davao City: Gimugna karong sa Davao City Police Office ang gitawag nga Cybercrime Response Team aron maoy gitahasan nga modawat sa mga reklamo ug mga biktima sa bisan unsang matang nga modus pinaagi sa online.
Sumala pa ni Police Colonel Kirby John Kraft ang hepe sa Davao City Police Office nga ang nahisgutang lakang tubag sa padayong pagsaka sa mga cybercrime incidents ning syudad.
Pinaagi sa Cybercrime Response Team modawat ang buhatan og mga mabiktimang dabawenyo sa daghang mga krimen online sama sa cyber libel, cyber bullying, grave threat, pagpangilad, pagsupak sa Republic Act 9995 (Anti-Photo & Video Voyeurism Act) ug uban pa.
Ipailalom una matod pa kini sa Women & Children Protection Desk sa Davao City Police Office sanglit sagad sa mga biktima ang mga kababaenhan ug menor de edad.
Samtang, suportado usab sa Regional Anti-Cybercrime Unit XI ang maong lakang ilabina nga ang Davao City matod pa ang dunay labing taas nga kaso sa cybercrime dinhi sa tibook rehiyon onse.
Pagbutyag pa ni Police Colonel. Noel Espinoza, Chief sa Regional Anti- Cyber Unit XI nga dakong tabang usab kini aron nga mas mapakusgan pa ang kampanya batok cybercrime dinhi sa Davao City.
