Pagadian City – Usa ka community pantry ang gipahigayon sa mga opisyales sa Barangay San Jose ning adlaw nga Domingo kon asa mukabat sa 300 ka mga pamilya ang gitagana nga ma-apod aporan sa maong mga goods, matud pa mao kini ang pinaka una nga community pantry nga gipahigayon sa maong Barangay. Gibutyag ni Hon. Glenn Stephen Arao-Arao ang Punong Barangay sa San Jose nahimo nila ang maong pantry tungod sa mga tabang usab sa mga nagpakabana nga mga indibidwal aron mahatud ug tabang sa mga mas nagkinahanglan.
Dugang pa nga walay bisan ni peso ang gigawas sa Barangay o wala kini budget aron mapahigayon ang aktibidad ug nag-gikan lamang kini sa mga sponsors. Posible matud pa nga masundan ang maong community pantry apan kini mag depende lamang sa mga mu-sponsor, gipaklaro ni Kapitan Arao-Arao nga adunay ticket nga ihatag sa mga indibidwal ug kini magsilbi isip puntos nga maoy basehan sa pila lang nga kantidad ang makuha sa tawo, ang maong ticket nagkantidad ug 150 points ug mao kini ang ipakita aron makakuha sa mga goods nga gi-andam sama sa Bugas, tinapa, noodles, itlog, mga untanon ug uban pang pwede nga makunsomo.
Gisayran nga gidagsa sa mga katawhan ang maong pantry apan wala matud pa nagpasagad ang Barangay ug pina-agi sa mga barangay Tanod ug Barangay Workers padayun gihapon nilang gipatuman ang mga health standard sama sa pagsuot ug facemask, ug ang pagpatuman sa social distancing, ana usab ang presensya sa kapulisan sa Pagadian City Police Station nga mitabang sa pagbantay aron mahimong malinawon ug walay bisan unsa nga kagubot ang mahitabo. (Wendel Cabrera)