Community Pantries Sa Syudad Sa Sugbo Wala Mag Require Og Permit; Kinahanglan Lang Nga Di Maka Balda Sa Dan, Mosunod Sa Health Protocols

Cebu City – Walay permiso nga gi-require ang kagamhanan sa dakbayan sa Sugbo sa community pantries nga gimontar sa mga mulupyo sa dakbayan sa Sugbo.

Ang ABC o Association of Barangay Councils pinaagi sa presidente nga si Konsehal Franklyn Ong miingon nga dalaygon ang maong pamaagi sa publiko nga buot motabang sa isig kaingon taliwa sa pandemya.

Tungod niini, matod ni Ong, gitambagan ang mga barangay nga pasagdan lang ang community pantries ug tabangan kon mohangyo ang mga organizers.

Suma pa ni Ong, tungod kay ang maong movement bag-o man, wa pa kini magkinahanglan sa pagpanghilabot sa gobyerno bisag ang barangay nag-monitor usab sa pantries aron dili malapas ang social distancing policy.

Ang hangyo lang sa pangu sa ABC nga kinahanglang dili makabalda sa dan nga sagad agian sa tawo ang community pantries.

Nabantayan ni Ong nga ang matag location managlahi busa nagkinahanglan usab kinig lahi nga atensiyon sa barangay.

Usa sa mga barangay nga mipahigayon sa maong adbokasiya ang Guadalupe pinaagi sa ilang One Guadalupe Community Pantry.

Sa pagkakaron duna na silay upat ka station; ang station 1 anaa mahimutang atubangan sa Simbahan sa Guadalupe, station 2  atbang sa Angel’s Pharmacy, station 3 atubangan sa Ludy’s store ug ang station 4 dool sa Emman’s Paanakan.  (Jhon Tadlip/JTY)

(Source: Association of Barangay Councils-Cebu City, photo courtesy of One Guadalupe-Cebu City via Rachel Olmogues)